Árlegi sýklalyfjadagurinn (The European Antibiotic Awareness Day) verður haldinn 18. nóvember nk. Dagurinn er haldinn til þess að vekja fólk til meðvitundar um þær slæmu afleiðingar sem ofnotkun á sýklalyfjum getur haft í för með sér, og um leið hvetja fólk til að sýna varkárni í notkun sýklalyfja. Nýjustu tölur í löndum Evrópusambandsins gefa til kynna umtalsverða aukningu í myndun ónæmra baktería, þ.e. bakteríur sem þola sýklalyfið og að sýklalyfjaþol sé farið að ógna almennri lýðheilsu.

Með skynsamlegri notkun á sýklalyfum hömlum við gegn myndun ónæmra  og fjölónæmra baktería (bakteríur sem þola mörg sýklalyf) og stuðlum þannig að því að sýklalyf geti nýst í framtíðinni.

Hægfara þróun sýklalyfja áhyggjuefni

Á 20. öldinni átti sér stað gríðarlega hröð lyfjaþróun og eru sýklalyf á meðal áhrifamestu lyfja aldarinnar. Á 21. öldinni er hinsvegar eitt helsta áhyggjuefnið að hvatinn til að fjárfesta í þróun nýrra sýklalyfja sé ekki til staðar. Með greiðslu-þátttökukerfi nútímasamfélaga hefur fólk aðgang að sýklalyfjum sem eru ódýr þar sem einkaleyfi fyrir þeim eru útrunnin. Fáir virðast h.v. reiðubúnir að kaupa lyf sem hafa verið þróuð nýlega og yrðu eðlilega dýrari. Að því leyti má segja að velferð fólks velti að verulegu leyti á þeim tímamótum sem sýklalyf eru á; tímamótum þar sem röng notkun þeirra og hægfara þróun eru samverkandi áhættuþættir.

Áhugasömum skal einnig bent á grein Péturs Heimissonar „Eru sýklalyf að verða gagnslaus?“ sem birtist í Morgunblaðinu 15. nóvember sl. Höfundur er heimilislæknir á Egilsstöðum og í greininni varar hann við ofnotkun á sýklalyfjum og þeirri hættu sem óþarfa notkun á þeim getur haft í för með sér. Að lokum hvetur hann fólk til hóflegrar notkunar á sýklalyfum og að það leiti ráða hjá fagfólki áður en lyfin eru tekin til að stuðla að því að þau geti nýst komandi kynslóðum sem best í framtíðinni.