Eins og komið hefur fram í fréttum í fjölmiðlum og hér á heimasíðu Frumtaka hefur baráttan gegn fölsuðum lyfjum verið hert verulega af hálfu Evrópusambandsins og fleiri landa í Evrópu. Aukið aðgengi að ýmiskonar söluvefsíðum hefur opnað fölsurum margar dyr.

Lyfjafalsarar sjá tækifærin fyrir sér. Með því að falsa lyf er áhættan af refsingum minni en af sölu eiturlyfja en gróðinn samt góður. Vegna þessa er nauðsynlegt að umburðarlyndi gagnvart fölsunum sé ekkert.

ESB þarf að ganga lengra

Evrópusambandið hefur kynnt nýjar áætlanir um hvernig hægt sé að taka á vandanum. Meðal aðgerða er samhæft athugunarkerfi fyrir lyf sem rekur tegund, sögu og uppruna hvers lyfs. EFPIA (European Federation of Pharmaceutical Industries and Associations) telja hinsvegar að Evrópusambandið þurfi að ganga lengra svo tryggja megi öryggi sjúklinga.

Vandinn sem við er að etja er djúpstæður og alvarlegur. Fölsuð lyf innihalda oft á tíðum eitruð efni, eru án virkra efna sem getur verið lífshættulegt þeim sem þurfa virku efnin eða geta innihaldið virk efni í röngu magni sem einnig getur verið hættulegt.

Þá eykst hættan enn frekar því nánast ómögulegt er fyrir sjúklingin að sjá hvort lyfið er falsað eða ekki. Núverandi reglur Evrópusambandsins ýta undir þennan vanda því Evrópusambandið leyfir endurpökkun á ýmsa vegu sem kemur í veg fyrir að hægt sé að nota rekjanlegar merkingar lyfjarfyrirtækjanna sjálfra.

EFPIA telur að breyta eigi reglum Evrópusambandsins á þann hátt að hægt sé að tryggja að ávallt séu notaðar upprunalegar umbúðir í gegnum alla vörukeðjuna. Án slíkra trygginga er erfitt að berjast gegn fölsunum.

Þá undirstrikar EFPIA einnig að nauðsynlegt sé að hafa samræmi á milli refsinga svo glæpahringir eigi ekki greiða leið að nýjum tækifærum.