Aðgengi og verðlagning lykilatriði þegar teknar eru ákvarðanir og þörf á reglugerðum sem hafa sjúklinginn í brennidepli.

Forseti Samtaka lyfjaframleiðenda í Evrópu (EFPIA) og framkvæmdastjóri GlaxoSmithKline, Andrew Witty, sagði í fyrstu ræðu sinni sem forseti á aðalfundi EFPIA í gær, mánudag, að þörf væri á nýrri orðræðu um lyfjamál milli stjórnvalda og lyfjaiðnaðarins til að auðvelda megi aðgengi sjúklinga að betri lyfjum og efla samkeppnishæfni Evrópu hvað varðar fjármögnun á sviði rannsókna og þróunar.

Sjúklingurinn í brennidepli

Witty lagði á það áherslu í máli sínu hve nauðsynlegt væri að stuðla að þróun á nýjum lyfjum og bóluefnum til að mæta áður óuppfylltum læknisfræðilegum þörfum. Þá sagði hann ekki síður mikilvægt að gefa sjúklingum viðeigandi hlutverk í ákvarðanaferlinu á sviði heilbrigðismála.

Ræðuna flutti Witty við upphaf aðalfundar EFPIA í Lundúnum og sagði meðal annars: „Mörg Evrópulönd eru nú undir miklum þrýstingi þegar kemur að stefnumörkun í heilbrigðismálum og sparnaðarkrafan er hávær vegna efnahagshrunsins. Við þurfum nýja orðræðu milli iðnaðar og stjórnvalda til að taka á erfiðum spurningum sem snerta okkur öll, hvað varðar aðgengi, verðlagningu og nýsköpun.“

Lyfjaframleiðendur fúsir til samstarfs

Witty gerði ekki lítið úr sífellt auknum hagræðingarkröfum vegna efnahagsástandsins í Evrópu og sagði lyfjaiðnaðinn skilja að hann verði að vinna með stjórnvöldum og opinberum stofnunum í raun.

„Við skiljum þær hömlur sem stjórnvöldum eru settar við fjárlagagerð, og viðurkennum nauðsyn þess að leggja áherslu á verðmæti þegar taka þarf erfiðar ákvarðanir um niðurskurð. Hlutverk okkar er að framleiða lyf og bóluefni sem mæta óuppfylltum þörfum og við tökum til greina að viðkomandi lyf og bóluefni þurfi að sýna virðisauka.“

Witty sagði nauðsynlegt að fyrir liggi sameiginlegur skilningur lyfjaiðnaðarins og stjórnvalda á því hvað virði sé. Til að ná þessu fram þurfi betri samskipti milli iðnaðar og yfirvalda, fyrir og eftir útgáfu markaðsleyfa.

Lyfjakostnaður er fjárfesting

„Byrjum á að líta á lyfjakostnað sem fjárfestingu. Það mun gera stjórnvöldum og lyfjaiðnaðinum kleift að marka stefnu í nýsköpun í heilbrigðis- og lyfjamálum. Það sem skiptir máli er, hvort lyf hafi tilætlaða virkni, hvort það svari þörfum sjúklinga og, ef sú er raunin, að slíkt sé viðurkennt.“

Witty kallaði eftir að aukið tillit sé tekið til sjúklinga þegar teknar séu ákvarðanir varðandi heilbrigðis- og lyfjamál. „Sjúklingar verða að vera í brennidepli við ákvarðanatöku. Þarfir þeirra ættu að hafa forgang þegar teknar eru ákvarðanir um aðgengi, úthlutun fjármagns og verðmætamat.“

Brian Ager, framkvæmdastjóri EFPIA, tók í sama streng og lagði einnig áherslu á aukið samstarf: „Ég vil að EFPIA taki þátt í að takast á við þær áskoranir sem stjórnvöld standa frammi fyrir um þessar mundir þegar fjármagn er af skornum skammti, á sama tíma og tryggja þarf aðgang sjúklinga að hágæðaheilbrigðisþjónustu og -meðferðum.

Það er forgangsverkefni að tryggja að sparnaðaraðgerðir bitni ekki á gæðum þjónustunnar eða dragi úr nýsköpun. Lyfjaiðnaðurinn í Evrópu byggist á rannsóknum og er leiðandi á sviði hátækniiðnaðar í álfunni, þar sem hann sér um 635 þúsund manns fyrir störfum og stendur fyrir 17% fjárfestinga á sviði rannsókna og þróunar.“