Ásættanleg áhætta

Margar hugsanavillur plaga mannkynið og virðast því sem næst ódrepandi. Sumar eru gamalgrónar og má nefna villuna um brotna gluggann sem dæmi um slíka forna villu.
Aðrar eru hins vegar nýrri og villan um að bólusetningar séu af hinu illa er tiltölulega ný. Vera má að hún hafi skotið upp kollinum fyrir árið 1998, en birting breskrar rannsóknar það ár, sem virtist tengja einhverfu í börnum við bólusetningar, olli ofsahræðslu víða um heim.
Niðurstöður rannsóknarinnar hafa fyrir löngu verið hraktar af ábyrgari vísindamönnum, en skaðinn var skeður. Í sumum vestrænum ríkjum hefur bólusetningum fækkað svo mikið að sjúkdómar, sem nánast var búið að útrýma, eru farnir að gera vart við sig að nýju.
Nýjasta dæmið um þennan hræðsluáróður eru fréttir af því að rannsókn sé hafin í Svíþjóð og Finnlandi á því hvort bólusetning gegn svínaflensu hafi valdið aukningu á svokallaðri drómasýki.
Ríflega þrjátíu milljónir Evrópubúa voru bólusettar við flensunni og í kjölfarið greindust 80 manns með drómasýki, langflestir í Svíþjóð og Finnlandi. Ef tenging væri milli bólusetningarinnar og drómasýki, hefði dreifing nýrra tilfella sýkinnar ekki átt að vera jafnari í Evrópu? Getur verið að eitthvað annað valdi drómasýki í Skandinavíu?
Hafa ber í huga að flensa getur verið gríðarlega skaðlegur sjúkdómur, eins og heimurinn fékk að kynnast veturinn 1918. Óábyrgar fullyrðingar um skaðleg áhrif bólusetningar auka líkurnar á mannskæðum faröldrum.
 
Bjarni Ólafsson
Birtist í Viðskiptablaði Morgunblaðsins fimmtudaginn 13. janúar 2011.