Frumtök hafa reglulega flutt fregnir af baráttunni við fölsuð lyf en lyfjafölsun hefur aukist verulega undanfarið í Evrópu, að miklu leyti þar sem viðurlög við lyfjafölsun eru vægari en viðurlög við framleiðslu eiturlyfja.

Í vikunni hleyptu íslensk tollayfirvöld af stað átaki sem ætlað er að benda á umfang almennra vörufalsana en mikið af fölsuðum varningi er fluttur til landsins.

Einkaleyfastofa tekur þátt í átakinu og mætti Borghildur Erlingsdóttir forstjóri Einkaleyfastofu í viðtal á Bylgjunni þar sem hún vakti athygli á átakinu.

Borghildur sagði í samtali við Bylgjuna að þeir sem flytja falsaða vöru til Íslands í því skyni að selja hana geri sér oftast fulla grein fyrir því að um falsaða vöru sé að ræða. Sumir reyni hinsvegar að selja hana á fullu verði en aðrir selji vöruna ódýrari þar sem ekki sé um ófalsaða vöru að ræða. Slíkt getur til dæmis gerst með ýmsa merkjavöru.

Það er hinsvegar ljóst að þegar lyf eru annars vegar hlýtur ásetningurinn að vera algjör. Engin myndi kaupa lyf vitandi að þau séu fölsuð því þá er ljóst að virkni þeirra er engin eða mjög hættuleg. Það er því um mjög alvarleg lögbrot að ræða þegar fölsuð lyf eru seld. Þá bætist við að afar erfitt getur verið að sjá mun á falsaðri og ófalsaðri vöru og á það jafnt við um lyfin sem annan varning.

Frumtök vilja vekja athygli á nýrri vefsíðu sem opnuð hefur verið í tilefni af átakinu; Falsanir.is. Á vefsíðunni er hægt að fræðast um umfang falsana og kynnast því hvaða hættur ber að varast. Þá ítreka Frumtök að á vefsíðunni er einnig hægt að koma nafnlausum ábendingum áleiðis svo hægt sé að handsama söluaðila þá sem selja falsaðan varning.