Lyfjanotkun á Norðurlöndunum, gefin upp í dagskömmtum á hverja 1000 íbúa, er mest í Finnlandi og Svíþjóð fylgir skammt á eftir.
Samkvæmt skýrslu Norrænu heilbrigðistölfræðinefndarinnar (NOMESCO) yfir lyfjanotkun á Norðurlöndunum á árunum 2004-2008, er lyfjanotkun nokkuð minni í Noregi, Danmörku og á Íslandi. Ísland er í fimmta sæti af sjö hvað heildarlyfjanotkun varðar.
Lyfjanotkunin er minnst á Álandseyjum, fyrir utan Grænland sem sker sig úr hvað litla lyfjanotkun varðar.
Hjartalyfin mest notuð
Á öllum Norðurlöndunum er áberandi mest notaði lyfjaflokkurinn hjarta- og æðasjúkdómalyf. Annar stærsti lyfjaflokkurinn er tauga- og geðlyf, nema í Svíþjóð þar sem blóðlyf eru meira notuð.
Heildarfjöldi dagskammta af hjarta- og æðasjúkdómalyfjum er mestur í Finnlandi, eða 487 skammtar. til samanburðar er notkunin á Íslandi 400 dagskammtar.
Tauga- og geðlyf eru mest notuð á Íslandi, í Danmörku og í Finnlandi. Fjöldi dagskammta á hverja 1000 íbúa er 314 á Íslandi, 267 í Danmörku og 257 í Finnlandi.
Lyf við meltingar- og efnaskiptasjúkdómum er þriðji stærsti flokkurinn í Danmörku og Finnlandi, en sá fjórði stærsti á Íslandi, í Noregi og Svíþjóð.
Ekki ein einföld skýring
Samkvæmt skýrslu NOMESCO, koma ýmsir þættir til greina til að skýra muninn milli landa á lyfjanotkun. Dánartíðni er til að mynda mismunandi og aldurssamsetning skiptir líka máli. Hlutfall eldri borgara er mismunandi og eins getur verið munur milli landa á samsetningu þeirra hópa sem þurfa á vissum lyfjum að halda.
Hefð fyrir meðferðarúrræðum virðist mismunandi milli landa og þá eru mismunandi venjur fyrir lyfjaávísunum milli landsvæða innan sama lands. Eins getur verið að aðgangur að heilbrigðisþjónustu og meðferðarúrræðum sé ójafn. Úrval ólyfseðilsskyldra lyfja er mismunandi og síðast, en ekki síst, hefur endurgreiðsla ríkisins að sjálfsögðu mikil áhrif á notkun.
http://nomesco-eng.nom-nos.dk/filer/publikationer/Medicines%20consumption%202004-2008%20web.pdf