Astma- og ofnæmisfélagið gefur reglulega út fréttablað. Í síðasta tölublaði birtist grein eftir Hjörleif Þórarinsson, lyfjafræðingur undir fyrirsögninni Öndunarfæralyf, sparnaður og lífsgæði. Hjörleifur, sem er framkvæmdastjóri GlaxoSmithKline á Íslandi og fyrrum stjórnarformaður Frumtaka, flutti erindi á málþingi SÍBS „Líf með Lyfjum“, sem haldið var þriðjudaginn 22. mars síðastliðin og byggir greinin á því erindi. Hér birtist samantekt úr greininni, með góðfúslegu leyfi Hjörleifs. Greinina og í heild má lesa á vef Astma- og ofnæmisfélagsins.

Samantekt

Áætlað er að um 5% Íslendinga glími við astma en sjúkdómurinn getur komið fram strax á unga aldri. Astmi er dæmi um sjúkdóm þar sem nútíma lyfjameðferð gerir kleift að ná mjög góðri stjórn á sjúkdómi, auka lífsgæði og draga verulega úr aukaverkunum, miðað við eldri meðferðarúrræði. Í langvinnri lungnateppu (LLT) hafa framfarir í þróun lyfja einnig breytt miklu, hægt er að létta á einkennum hægja á framgangi sjúkdómsins, fækka tilfellum sjúkdómsversnunar og lengja líf.

Það má áætla að öndunarfærasjúkdómar kosti Íslenskt samfélag um 8,6 milljarða á ári, þar af er kostnaður vegna LLT 4,8 milljarðar og áætlað framleiðslutap um 6,4 milljarðar. Öflugar forvarnir, fræðsla og rétt notkun lyfja eru úrræði sem geta dregið úr þessum kostnaði.

Raunverulegur sparnaður vegna breytinganna á greiðsluþátttöku öndunarfæralyfja var ekki í neinum takti við væntingar stjórnvalda og ýmsum spurningum vegna þessara breytinga er ósvarðað. Hafa aðgerðirnar aðeins rýrt lífsgæði sjúklinganna eða hafa þær einnig aukið kostnað þeirra, leitt til verri meðferðar og fjölgað komum sjúklinga til lækna og á sjúkrastofnanir?