Danir hafa lengi vel verið taldir búa yfir góðu velferðarsamfélagi. Eitt kerfið sem Danir geta nýtt sér er eftirlaunakerfið sem gerir þeim sem borga í kerfið kleift að hætta að vinna þegar 60 ára aldri er náð. Kerfið er einskonar millistig áður en ellilífeyrir tekur við en þannig er hægt að njóta þess að hætta að vinna fimm árum áður en ellilífeyrir tekur við en þessi fimm ár á einu besta tímabili ævinnar geta verið afar dýrmæt.

Kostnaður við slíkt kerfi er verulegur en lífsgæði fólksins sem ná að hætta að vinna svo snemma geta verið mjög mikil eins og gefur að skilja. Þetta má vega á móti þeim 14 þúsund einstaklingum sem talið er að láti lífið á hverju ári í Danmörku af völdum reykinga því kostnaðurinn af eftirlaunakerfinu er ekki bara hliðstæður kostnaðinum af reykingum heldur er hann tvöfalt meiri en kostnaðurinn af eftirlaunakerfinu.

Reykingar eru með öðrum orðum ekki bara böl þess sem glímir við fíknina heldur mikill baggi á samfélaginu.

Á Íslandi hefur dregið úr reykingum undanfarin ár eftir því sem kemur fram í niðurstöðum rannsóknar Capacent Gallup á vef Lýðheilsustöðvar. Á síðasta ári var tíðni daglegra reykinga hjá fullorðnum 14,2% en árið áður var hún 15,4%. Talsverður árangur hefur náðst frá árinu 1991 en þá var tíðnin 29,8%. Í Danmörku er reykingar mun tíðari en talið er að 23% þjóðarinnar reyki daglega og 4,8% til viðbótar reyki annað slagið.

Það þarf líklega ekki mikið ímyndunarafl til að gera sér grein fyrir því hve kostnaðarsamar reykingar eru fyrir þjóðina ef tekið er mið af þessum tölum í Danmörku og á Íslandi. Allt að 400 Íslendingar deyja af völdum reykinga á hverju ári og talið er að kostnaðurinn af reykingum sé um 19 milljarðar á ári. Ef gert er ráð fyrir að um 28500 Íslendingar reyki daglega og kostnaðinum er deilt niður á hvern einstakling er kostnaður af reykingum hvers og eins um 700 þúsund krónur, á ári.

Í danskri rannsókn kemur fram að 54% reykingafólks hafi áform uppi um að hætta að reykja. Mögulega er svipað uppi á teningnum á Íslandi. Það vantar því ekki viljann hjá flestum reykingamönnum en mikilvægt er að styðja við þá sem vilja að hætta að reykja með öllum tiltækum ráðum eins og með ráðgjöf eða lyfjum sem kunna að hjálpa. Með því að blanda saman ráðgjöf og lyfjum er mögulegt að tvöfalda, eða jafnvel þrefalda, líkurnar á því að reykingamaður hætti að reykja.

Mikilvægt er að benda þeim sem vilja hætta að reykja á leiðir sem gagnast við að hætta. Heilbrigðisstarfsfólk getur einnig lagt mikið af mörkum með því að spyrja út í reykingavenjur fólks en þannig má grípa inn í hjá þeim sem eru byrjaðir að stíga fyrstu skrefin í að hætta reykingum og hjálpa þeim við að stíga næsta skref.

Ráðgjöf fyrir þá sem vilja hætta að reykja.