Eftir því sem upplýsingatækninni fleytir fram verður sífellt auðveldara að deila rannsóknargögnum. Þetta hefur mikil áhrif á heilbrigðisstéttirnar og lyfjaiðnaðinn þar sem fagfólk á kost á því að byggja á vinnu hvers annars við rannsóknir. Það er því engin þörf á að finna upp hjólið í hvert skipti.

Það er þó ekki algild regla að rannsóknargögn séu aðgengileg og þeim deilt en lyfjaiðnaðurinn hefur tekið mikilvæg skref til að tryggja aðgengi að rannsóknargögnum svo hraða megi þróun lyfja við mannskæðum sjúkdómum. Sama tilhneiging á sér stað almennt í heilbrigðisgeiranum og hafa margir fagaðilar lýst því yfir á undanförnum árum að meira skuli gert í þessa veru.

Dýrt og tímafrekt
Með því að deila rannsóknargögnum í auknum mæli er auðveldara að ná fram þremur megin markmiðum. Þróun í heilbrigðisgeiranum yrði hraðari sem myndi stuðla að betri heilsu, meira fengist fyrir það stórfé sem árlega er veitt í rannsóknir og gæði rannsóknanna myndi að öllu líkindum aukast verulega.

Það er hinsvegar ekki einfalt mál að ná þessu fram þar sem nauðsynlegt er að finna jafnvægi á milli þarfa þeirra sem kosta frumrannsóknir og þeirra sem geta nýtt sér upplýsingarnar í frekari rannsóknir.

Það er hinsvegar til mikils að vinna því hinn valkosturinn er sá að samkeppnisaðilar keppist við að þróa heilbrigðislausnir og sæki um einkaleyfi með tilheyrandi tvíverknaði, töfum og auknum kostnaði.

Hægt er að líta til genarannsókna í Bandaríkjunum til að sjá hver þróunin getur verið. Þar í landi stóðu heilbrigðisyfirvöld frammi fyrir erfiðum ákvörðunum þar sem árangur kostnaðarsamra rannsókna var lítill. Heilbrigðisyfirvöldin tóku því þá ákvörðun að styðja aðeins við rannsóknir þar sem því var lofað að rannóknargögn yrðu gerð opinber. Þetta var árið 1986 og þar með var ísinn brotinn. Síðan þá hafa vísindamenn getað byggt rannsóknir á vinnu hvers annars sem hefur hraðað framþróun gríðarlega og leitt til betri greininga og meðferðar. Hið sama má segja með lyfjaiðnaðinn sem birtir reglulega nauðsynleg gögn.

Lykillin að æskilegri þróun á þessu sviði er hinsvegar upplýsingatæknin en með nýjustu tækni eru gagnagrunnar sífellt að verða aðgengilegri, hraðvirkari og skýrari í notkun. Tölvutæknin nýtist þá að sjálfsögðu við hreina úrvinnslu og með nýjum lausnum á sjónrænni framsetningu gagna er vísindamönnum gert kleift að koma auga á nýjar leiðir – og finna nýjar lausnir.

Ljóst er að stöðugt þarf að skoða nýjar leiðir og lyfjaiðnaðurinn stendur frammi fyrir því að framundan sé langur og torfær slóði eftir miklar lyfjaframfarir síðustu áratugi. Lyfjafyrirtækin Pfizer, GlaxoSmithKline, AstraZeneca, Johnson & Johnson, Novartis AG Sanofi-Aventis, og Abbott Laboratories sameinuðust á síðasta ári til dæmis um að deila rannsóknargögnum vegna Alzheimers og Parkinson rannsókna og verður fróðlegt að sjá hvort fleiri og tíðari áfangar muni ekki nást með slíkri samvinnu.