Sænsk heilbrigðisyfirvöld, samband sænskra sveitarfélaga og
LIF, samtök frumlyfjaframleiðenda í Svíþjóð (systursamtök Frumtaka), hafa gert með sér tímamótasamning sem ætlað er að bæta nýtingu lyfja, styrkja rannsóknir og þróun í lyfjaiðnaðinum og halda útgjöldum hins opinbera til lyfjakaupa innan ákveðins ramma.
Í yfirlýsingu frá LIF segir að samtökin fagni aukinni og styrkari samvinnu. Grundvallaratriði samkomulagsins er að lyfjaverð í Svíþjóð verður áfram grundvallað á þjóðhagslegri hagkvæmni lyfja og heilsuhagfræðilegum útreikningum, frekar en með alþjóðlegum samanburði á lyfjaverði. Richard Bergström, framkvæmdastjóri LIF í Svíþjóð, segir að nú skapist sameiginleg markmið í mörgum mikilvægum málum. „Það er mikilvægt að ný lyf séu tekin fljótt inn, komist sem fyrst í notkun, en það er ekki síður mikilvægt að því sé fylgt vel eftir. Einhliða fókus á magn og kostnað ætti að víkja fyrir markmiðum um gæði og framtíðarsýn um heilbrigðisþjónustu sem snýst um virðisauka.“
Samkvæmt áætluninni sem samstarfið byggir á verður lögð á það áhersla að efla lyfjarannsóknir. Bergström segir það jákvætt á margan hátt. Það gagnist sjúklingum, það gagnist rannsóknaumhverfi í Svíþjóð, það gagnist hágæða heilbrigðisþjónustu í Svíþjóð og það skapi umhverfi sem ýti undir að lyfjafyrirtækin – bæði stór og smá – starfi og fjárfesti í Svíþjóð. Hann hlakki til að starfa eftir áætluninni.
Eins og segir í tilkynningu LIF, þá tekur lyfjaiðnaðurinn sinn skerf af ábyrgðinni. Efnahagsástandið er alvarlegt og sveitarstjórnir þurfa áreiðanlegar kostnaðaráætlanir fyrir framtíðina. Bergström segir að lyf eigi að nota ef sýnt sé fram á skilvirkni þeirra og að lyf eigi að verðleggja samkvæmt virðisaukanum sem þau færi samfélaginu.
LIF axli ábyrgð með því að skuldbinda sig til að halda lyfjakostnaði undir vissu hámarki. Það, auk þeirra verðlækkana sem gerðar hafi verið hjá aðildarfyrirtækjum LIF í fyrra, sýni að lyfjafyrirtækin taki þetta samstarf mjög alvarlega.
Bergström segir marga njóta góðs af samvinnu sem þessari. Efnahagurinn njóti góðs af fyrirsjáanlegum lyfjakostnaði og lyfjafyrirtækin njóti að sama skapi góðs af fyrirsjánlegum markaðsaðstæðum.
„Það kemur fyrirtækjunum vel að ný lyf skuli vera notuð og fylgst með virkni þeirra innan heilbrigðiskerfisins. Það getur leitt til þess að einhver lyf reynist ekki standast væntingar og þau eiga þá ekki að vera í notkun. Ef ný lyf eru sett hér fljótt á markað á skilvirkan hátt og það kemst fljótt klínísk reynsla á notkun þeirra, þá getur Svíþjóð orðið ákjósanlegur kostur fyrir fjárfestingar á heimsvísu í lyfjaiðnaði,“ segir Bergström.
Framar öllu gagnist fyrirkomulagið þó sjúklingum. Þeir öðlist á þennan hátt aðgang að nýjungum í heilbrigðiskerfi á heimsmælikvarða.